Мермер или гранит: кој камен да изберете

Која е разликата меѓу мермерот и гранитот?

Мермерот е метаморфен камен: варовник што под притисок и топлина се прекристализирал. Затоа е помек, топол на изглед и со карактеристични вени. Гранитот е магматска карпа од кварц, фелдспат и лискун – многу поцврст, со зрнеста шара наместо вени. Во трговијата „гранит“ се викаат и други тврди магматски камења, како габрото.

Затоа мермерот го избираме таму каде што е најважен изгледот, а гранитот таму каде што површината трпи најмногу – мраз, сообраќај и киселини.

Кој камен е поотпорен на гребење и дамки?

Гранитот е меѓу најтврдите природни камења и тешко се гребе. Мермерот е помек и почувствителен на киселини – сок од лимон, вино или оцет можат да остават матни траги ако не се избришат брзо. Тоа не е дамка во каменот, туку површината што ја нагризала киселината; кај полиран мермер се гледа повеќе.

• Гранит – кујнски плотови, работни површини, надворешни скали, површини со интензивна употреба.
• Мермер – влезови, бањи, подови, скали, фасади (буња) и споменици – каде доминира изгледот.

Дали мермерот и гранитот се за надвор?

Да, и двата. Гранитот има многу ниска апсорпција на вода, што го прави отпорен на мраз и погоден за надворешна употреба во нашата клима. Мермерот се користи и надвор – за скали, буња на фасади и споменици – а за површини постојано изложени на вода и мраз препорачуваме рапав финиш и импрегнација.

Правило: ако површината е изложена на вода, мраз или киселини – размислете за гранит. Ако доминира изгледот на затворено – мермерот е тешко да се надмине.

Кој камен за кој простор?

• Кујна и работни плотови – гранит, поради отпорноста на гребење и киселини.
• Бања – двата; мермерот дава топлина, гранитот полесно се одржува.
• Подови на затворено – двата; кај мермерот внимавајте на киселини и песок што гребе.
• Надворешни подови, тераси и дворови – гранит или мермер во рапав финиш.
• Скали – полирани за внатре, рапави за надвор, од гранит или мермер.
• Фасади и ѕидови – буња од мермер или гранит, со природно расцепено лице.
• Споменици – мермер за класичен сив или бел изглед, гранит за длабоки темни тонови и висок сјај.

Полиран или рапав финиш?

Полираниот финиш ги истакнува бојата и шарата на каменот и дава сјај, но кога е влажен е полизгав. Затоа е за внатрешни простори. Рапавиот финиш има мат, текстурирана површина и дава добра отпорност на лизгање – за надворешни подови, тераси и скали. Истиот камен често го има во двата финиша, па изборот зависи од местото, а не само од каменот.

Колку тежи каменот?

Тежината е важна за превоз, носење и монтажа. Кај нашите камења, плоча од 2 cm тежи околу 52–55 kg/m² кај мермерот и околу 52–61 kg/m² кај гранитот, зависно од густината. Точната тежина по m² е наведена на страницата на секој производ, а во „Моја понуда“ се пресметува и проценетата тежина на целата нарачка.

Како се одржуваат?

Двата камена имаат корист од импрегнација што ги штити од дамки. Гранитот бара минимална грижа; мермерот сака внимание кон киселини и повремено полирање за да го задржи сјајот.

• Чистете со вода и неутрален детергент; избегнувајте оцет, лимон и агресивни средства, особено на мермер.
• Брзо избришете истурена течност, пред да навлезе или да ја нагризе површината.
• Обновете ја импрегнацијата повремено, според тоа колку е изложена површината.

Накратко: мермер или гранит?

• Изберете гранит за кујни, работни површини и места со многу сообраќај, вода и мраз.
• Изберете мермер каде што доминира изгледот – бањи, влезови, скали, фасади и споменици.
• За надвор изберете рапав финиш, а за внатре полиран.

Ако не сте сигурни кој камен одговара за вашиот простор, пишете ни или испратете барање за понуда – ќе ви предложиме камен според намената.